Шорыкйол деч вара шарнымаш

11.01.07

Теве эше ик ий эртен кайыш. Юмын пуымо ÿмырна ик талуклан ешаралте. У ий дене пырля Шорыкйол пайремат лишеме. Тиде арня мыланем лач йомакыште илымыла чучеш, молан манаш гын тиде жапыште мöчöр лийын кошташ веле огыл, мужедашат лиеш. Тыге арня мучко уремыште йÿк-йÿан шокташ тÿҥале. Тидын нерген шоналтемат, оҥайын чучеш, мыят вет йолташем дене кажне ийын Васли кува лийын коштына.

Теве ик ийын мый Салтак, а тудо Марий вате лийна. Тиде вургемже кугурак капемлан келшен веле толын. Мöҥгыштö пÿкшым тамлымеке, сурт еда уна лияш кайышна. Урем дене моло семынак у-у-у манын кычкыренна. Икте, весе, кумшо пöртышкö пурымеке, корнына ял мучашкат лишеме. Пычкемыш урем дене ошкылмо годым чонлан шуй-й-й, каплан копыж-ж-ж чучын колта, но шке, шеҥгек чакныде, ончыко каена. 

Икмыняр жап гыч ваштарешна кенета рвезе-влак лектын шогальыч. Лÿдмынам ончыктыде, пöръеҥ семын кидым шуялтен саламлалтна. Кидым кучымо дене ынышт пале манын, мыят чотрак кормыжтальым. "О, марий ватыже ÿдыр гын, салтакше качымарияк улмаш", ыштальыч да чурийна гыч авыртышым почаш тöчышт. Лумышто сайынак йÿштылалташ, вийдыме коя маска семын пöрдалаш логале гынат, чурийнам почын ышт керт.

Тыгодым салтак вургемым чийымемлан, мÿшкырыш кÿпчыкым пыштен лекмемлан да кужу шулышан кугу портышкемым чийымемлан шкемым шке шÿдö пачаш вурсышым. Туге шол, шке мöчöр лият гын веле чылажымат пален налат да пайремжат пайремлак чучеш. Ынде мыят ончычсо шемалге-ужар тÿсан салтак шинельын куштылгыжак огылжым пален нальым. Адакшым вет мыняр пöртыш пурет, тунар еҥын койышыжым, поро але осал улмыжым, унам сийлен моштымыжым, кид-йол мастарлыкшым пален налаш лиеш. Ожно арамлан мо шонеда мöчöр-шамыч ÿдыр-влакын кидпашаштым акленыт.

К.Леонтьева.

"Марий Эл" газет, 1 (22654) №  2006 ий 10 январь

Теме дене кылдалтше линк:
Шорыкйол