Mari-Records суртан лийын
16.01.07
"Мурызо - вуйлатыше!" Йонга!
 Mari-Records
продюсер рÿдерым идалык ончычак чумырымо
да кызыт марте шагал огыл пашам ыштен гынат,
але марте суртдымо-печыдыме гай лийын.
Но ынде тудынат шкенжын верже лектын - Йошкар-Оласе
Красноармейский уремыште ик чапле пöлемым
айла.
- Пашам ышташ кызыт йöнна сай,- каласкала
рÿдерын директоржо Андрей Чемышев.-
Чапле мебель деч посна компьютернат, мурызо-влаклан
фонограммым возаш аппаратурынат уло. Тудым
ме "Плес" фирма гыч конденна. Самырык мурызо-влаклан
полшаш ынде йöнна ситышынак: мурым возаш,
компакт-дискыштым лукташ, икманаш, нöлташ,
продюсер полышым пуаш тÿҥалына. А моло
мурызо-влаклан договор почеш компакт-диск
ден DVD-м лукташ, концертым эртараш эҥертыш
лийына. Кылна республикыште веле огыл,
вес кундемлаштат уло. Мутлан, Татарстаныште,
Удмуртийыште, сандене öрдыжтат калыкым
чумырен кертына. Фирма ден организаций-влакын
йодмышт почеш корпоративный пайрем касым,
юбилейым эртараш шонымашна уло.
- Рÿдерын "кагазыште" улмыж годымат
ятыр паша эртаралтын манын ойленат ыле.
Лачшымак мом ыштенда?
- Мутлан, Йошкар-Олаште ИФУСКО эртаралтме
годым чыла культура мероприятийлан лач
ме вуйын шогенна. А тиде вет тÿнямбал кÿкшытан
погынымаш лийын. "Ди-джей Дождик" группым
Йошкар-Олашке ме ÿжынна. Марий Эл радио
гоч могай пайрем ден концерт лийын гын,
шукыжо адакат рÿдер полшымо дене эртаралтын.
"Морко кундем" ансамбльымат олашке меак
конденна. Томас Андерс ден Валериян концертышт
годым нуным кö оролен, тушкат мый нине еҥ-влакымак
пашам ышташ налынам. Тидым оҥайлан да марий
концертлаштат тыгай сай орол лийын кертеш
манын ончыкташ лÿмынак ыштенам.
- Лишыл жапыште ала теат Российысе
иктаж чапланыше мурызым ÿжаш шонеда?
- Тыгай шонымаш уло. Мый "Не пара" группа
ден Юрий Шатуновым кондынем.
- Молан лачшымак нуным, а эшеат чапланыше-влакым
огыл?
- Чыным ойлаш гын, нуно мылам огыт келше.
Нуным окса могырым кондаш пайдале, вет
концертым эртарымаште кöмыт спонсор лийын
кертыт, нине мурызо-влак тугай палымем-влаклан
келшат.
- Рÿдерын генеральный директоржылан
молан мурызо Александр Речкиным налында?
- Мый шуко жапым Марий Эл радиошто эртарем
да тыште пашам ыштен ом шукто ыле. А Саша
лачак телевидений гыч каен да яра лийын.
Адакшым тудо творческий айдеме, шкежат
мура, тиде пашам сайын пала, сандене артист-влаклан
тудын дене мутланаш, ик ойыш шуаш куштылгырак
лиеш. Мутлан, Казаньыштат "Барс-Медиа" татар
продюсер рÿдерым чапланыше эстрада шÿдыр,
самырык мурызо рвезе вуйлата. Тушто паша
сайын кая. Сашанат пашаже вораҥшаш, шонем.
Любовь Камалетдинова
мутланен.
М.Скобелевын фотожо
"Марий
Эл" газет, 4 (22657) № 2006 ий 13 январь
|