Пошкырт: Марий рÿдер ила, пашам ышта
31.01.07
 Башкортостан
Республикын Президентшын 2003 ийысе Пунчалжым
илышыш пуртышашлан республикыште илыше
калык-влакын историй да тÿвыра рÿдерыштым
ышташ тÿҥалме. Чылаже 14 тыгай рÿдер лийын,
а тений эше ныл калык шке рÿдержым ыштен.
Ынде 18 рÿдер пашам ышта. Ончыч рÿдер-влак
Тÿвыра министерстве пелен шотлалтыныт
гын, ынде Башкортостан Республикысе «Келшымаш
пöрт» кугыжаныш учрежденийын пöлкаже улыт.
Марий калыкын историй да тÿвыра рÿдерже
2004 ийыште почылтын. Негызым пыштыше погын
Нерге ялыште лийын. Тушакынак марий-влакын
республикысе историй да тÿвыра рÿдерым
Мишкан селаште ышташ пунчалме. Рÿдерын
вуйлатышыжлан В. Т. Байбулатовым сайлыме.
Вуйвер пелен ныл комиссий ышталтын.
2006 ийыште паша палемдыме план почеш шукталтын.
Поснак март тылзе лектышан лийын. Мартыште
Благовещенск педколледжыште «Калык педагогикыште
ойöрын верже» тема дене шанче-практик конференций,
Мишканыште «Ӱярня» пайрем, Мишканыштак
«Яндар йÿк» регион-влак кокласе таҥасымаш
эртаралтыныт. Июньышто Кугу Соказа яллан
400 ий теммым палемдыме, июльышто Калтаса
районышто Кÿсö кумалтышым эртарыме. А.
Искандаровлан (Ирсай, Мишкан), Я. Ялкайнлан
(Чорай, Мишкан), В. Искаковлан (Янаул район,
Рабак ял) 100 ияш лÿмгече-влакым кумдан пайремлыме.
Вес элла гыч шанчыеҥ-влакым вашлийме да
моло пашат шукталтын.
Историй да тÿвыра рÿдерлан кызытеш ик
штатный паша верым ойырымо, кок комплект
компьютерым, ксероксым налме.
2007 ийыште шуктышаш паша-влак кокла гыч
эн кугу верым Пÿрö олаште Марий калыкын
икымше погынжым эртарымылан (1917 ий, июль)
90 ий теммым палемдымаш да Башкирийын Россий
кугыжанышыш шке кумылын ушнымыжлан 450 ий
теммым Москошто пайремлыме годым «Марий
кудым» ончыктымаш налеш.
Паша шуко. Сандене районлаште историй
да тÿвыра рÿдерын пöлкаж-влакым вияҥдыман.
Марий-влак илыман 14 районышто тыгай пöлка
лийшаш. Кызыт улшо пöлка-влакын раш пашашт
огеш кой, а икмыняр районышто ты паша верже
гычат тарванен огыл.
Чыла тидыжым рÿдерын вуйлатышыже В. Т.
Байбулатов 23 январьыште эртыше отчет погынымашыште
ойлен. Вара комиссий вуйлатыше-влак, кажне
район гыч толшо колтымъеҥ-влак выступатленыт.
2007 ийыште шуктышаш паша планым пеҥгыдемдыме.
Выступлений-влак почеш тийышле пунчалым
лукмо. Вуйвер еҥ-влакын погынымашыштым
кварталлан ик гана чумыраш кутырен келшыме.
"Келшымаш"
газет, 31 январь № 12-13 (8464)
|