Олорышто "Герасимов лудмаш" конкурс эртен

02.03.07

"Коднем, муро лийын, мый калык чонеш…"

Ко тугай Еремей Герасимов? Могай жапыште илен? Мом йÿын, мом кочкын? Кöм йöратен да пагален? Могай вий ялысе айдемым, волгенче гай шонымаш дене тÿкнымеке, тудым почеламут корныш пышташ таратен, шочмо мландым, поро пошкудо ден лишыл родым чапландарен илаш кумылаҥден? Тыгай йодыш-влак вуйыш толын пернышт Олор школышто лийме деч вара. Пургыж тылзын 19 кечынже тыште кумшо гана Олор ялын данле эргыже Еремей Герасимов лÿмеш увертарыме поэзий пайрем эртыш.

Тушко районысо школла гыч икшыве-влакым конденыт ыле. Олор ялын туныктышыжо ден тунемшыже-влак Матародо, Усола, Ермучаш, Параньга, Кугу Пумарий кундемласе самырык тукымым шокшын вашлийыч. 

Сылне марий вургеман 26 ÿдыр-рвезе чолга койыш-шоктышышт дене Олор кундемысе поэт-влакын почеламутлаштым йоҥгалтарышт. М.Деляновын, А.Ороспаевын, Н.Никитинан, И.Делянован, Т.Очееван чон мурышт колышташ толшо калыкым вургыжтарыш. Кум икшыве Е.Герасимовын почеламутшым йоҥгалтарыш. 

Изирак-влак коклаште сеҥышыш Л.Рублева (Олор школ), Н.Жилина (Олор школ), И.Леонтьева (Усола школ) лектыч. Нунын йоҥгалтарыме М.Деляновын "Кутко еш", "Поран", Т.Очееван "Таза памаш" угыч шочмо мланде нерген шоналташ, тудын пÿрымашыжым шке кидыште кучен илаш таратыш. 

Кыдалаш ийготан-влак кокла гыч Ю.Тихонова, Л.Болгарева, А.Жилина ойыртемалтыч. А кугурак класслаште тунемше-влак кокла гыч лудшо шагалрак лие: улыжат визытын гына. Оксана Иванова (Матародо школ) Н.Никитинан "Коваем", Н.Жилина (Олор школ) Т.Очееван "17 ияш", Л.Емельянова (Усола школ) Н.Никитинанак "Пÿртÿс-ава" почеламутышт дене ойыртемалтыч.

Öрдыж гыч ончалаш гын, поэзий пайрем моло тыглай пайрем семынак эртыш. Калык шуко погынен. Кумылышт чылаштынат нöлтшö ыле. Но вашлиймаш деч ончыч шочшо йодыш-влак тугакак южышто пöрдыч. Таче ты пайрем директорын воспитательный паша шотышто алмаштышыже, калык-влакын историй ден культурышт предметым туныктышо Э.М.Кочергинан, моло туныктышын тыршымышт дене сайын эртыш. 

Ончыкыжым ты паша утларак пайдале да лектышан лийже манын, коло-кумло ий гычат Герасимов лÿмеш лудмаш илыже манын, поэтын оргажан илыш корныжым, сылнымут ойпогыжым пырчын-пырчын поген, шымлен лекде огеш лий. Вет мом палымынаже, умылаш тыршымынаже урзо нарат уке. Эше вараш кодмо огыл: воктеннак илат тудын таҥашыже, йолташыже-влак, улыт дыр родо-тукымжат. Но тиде пашам тÿҥалме деч ончыч поэтын Унчо кундемыште улшо шÿгарже ÿмбалан чапкÿм шогалтыман. Вет тоштыеҥым порын да арун шарнен илаш - кугезына-влакын сугыньышт. 

Зоя Глушкова

Важ: "Марий Эл" газет