Марий композитор-влак нерген книга, кассет да семсалма-влак

30.03.07

Шукертсе шонымаш шукталтеш

Марий Элын Тÿвыра, печать да калык коклаште пашам виктарыше министерствыжын туныктымо-методик кабинетше пытартыш ийлаште марий семлызе-влак нерген шагал огыл книгам савыктен, сем произведенийышт дене возыман йÿк-кассет, семсалма-влакым ямдылен лукто. Тыге республикысе кучем велым культурылан тÿткыш ойыралтеш. Нине книга ден сем аршаш-влакым республикысе музык ден сымыктыш школлаште йоча-шамычлан сай методик полыш семын аклыман. Кабинетын директоржо Ольга Радостева дене шукерте огыл тидын нергенак мутланышна.

"Пашаже, чынжымак, пеш кÿлешан, - мане Ольга Алексеевна. - Музык школлаште туныктымо годымак рашемын: марий семлызе-шамычын илыш да усталык корнышт нерген книга пеш шагал. Пеш кугу "яра олмо" палдырнен. Туныктымо-методик кабинетыш пашаш толмекына, ме ты чырым кораҥдаш пижна. А марий семлызе-влакын возымо музыкышт нерген книга гоч каласкален гына серлагаш ок лий. Шарнымашеш кодшо манын, самырык музыкчо-шамыч композиторын семжымак колыштшаш улыт. Мурымо жанрымат, симфоний музыкымат палыман. Ме тунамак Марий кундем дене кылдалтше композитор-влакын семышт дене йÿк-кассет-влакым ямдылаш шонен пыштышна.

Чылажат икмыняр ий ончыч тÿҥале. Семлызе Андрей Эшпайлан 80 ий темме вашеш книгам ямдылышна. Илыш да усталык корныж нерген материал ситышынак ыле. Тидын годымак семлызе нерген каласкалыше видеофильмым йÿк-кассетыш возымо. Тушкыжо Андрей Яковлевичын Марий телевиденийын вундыштыжо улшо сем произведенийже-шамыч, телепередача гыч ужаш-шамычат пурталтыныт. Марий телевиденийын да радион тÿҥ директоржо Владимир Оленевлан кугу таум ойлымо шуэш. Телевидений чыла тиде видеоматериаллан оксам налын огыл, кумыл йодмо почеш полшен. Чапланыше семлызе Андрей Эшпай нерген кандаш минуташ тиде фильм Марий республикысе музык ден сымыктыш школ-влаклан темлалтеш. Йоча-влак тек мемнан тÿнямбалне чапланыше композиторнам сайын палат да тудын дене кугешнат". 

А вара икте почеш вес семлызын лÿмгечыж дене кылдалтше дате-влак лишемыныт. Иван Палантайын шочмыжлан 120 ий темме лÿмгечылан книгам савыктен луктыныт. Музыкшанчызе Ираида Яшмолкина кугу полышым пуэн. Иван Степанович нерген семсаска портретымат тудо моткоч сайын да радамын палдарен серен. Палантайын сем произведенийже-влакымат семсалмаш чумыреныт. Яков Эшпайын, Анатолий Лупповын, Владислав Куприяновын, Константин Гейстын, Алексей Искандаровын, Виталий Алексеевын, Элина Архипован илыш ден семсаскашт нерген усталык портрет шотан пого-шамычым савыктеныт. Тыгак сем произведенийышт дене семсалма-влакымат лукмо. Ончыкыжо Лев Сахаров нерген книга вуча. Тудым музыкшанчызе, Россий культурын сулло пашаеҥже Р.Артищева чумырен. Тыгак композитор Эрик Сапаев нергенат семсаска портрет ямде.

Чаманаш логалеш, книга-влакын тиражышт шагалрак. Кажныже 50 экземпляр дене ош тÿням ужын. Но Ольга Алексеевна ÿшана: ончыкыжо "калыклан кÿлешан литератур" семын, Тÿвыра, печать да калык коклаште пашам виктарыше министерстве гочак нине пого-влакым шукырак тираж дене савыктен лукташ йöн лиеш.

Снимкыште: О.Радостева.

Важ: "Марий Эл" жаплышташ