Тудын нерген шарнымаш калык шÿмыштö ила
12.04.07
Гурий Гаврилович Кармазинлан 125 ий
 Ты
кечын игечыжат молгунамсе деч левырак
лийын, южышто шошо пуш шижылтын, мален помыжалтше
пасуат шошо толмо нерген ойлен.
Эшым школ ончылно тунемше, ял калык, тÿрлеман
тувырым чиен, уна-влакын толмыштым вученыт.
Уна-влак толмеке, нуным уна вашлийме муро
дене, кинде-шинчалым кучен, мурен-мурен
вашлийыныт. Варажым толшо-влакым поро оза-влакын
сийыштым тамлен ончаш йодыныт.
2002 ийыште Эшым ялысе калык тыгак уна-влакым
вашлийын. Тунам Эшым школ Гурий Гаврилович
Кармазинын шочмыжлан 120 ий темме лÿмгечым
палемден. Юбилей пайремым эртарыме годым
писательын илыме суртыштыжо шарнымаш оҥам
почмо.
Тиде гана кумдан чапланыше шанчызе-йылмызе,
фольклорчо, тунемме книга-влакын авторжо
да педагог-методист, уста поэт Г. Кармазинын
шочмыжлан 125 ий теммым палемденыт.
Йырым-ваш весела кумыл озаланен. Пайремыш
толшо уна-влак, район администрацийын,
туныктеж пöлкан, тÿвыра пöлкан, марий культур
рÿдерын еҥышт, ветеран, ял калык школысо
спортзалыш погыненыт.
- Пагален ÿжмö уна-влак, школысо тунемше
ден ялысе калык! Таче ме тендан дене мемнан
землякна, кумдан чапланыше сотемдарчын,
шымлызын шочмыжлан 125 ий теммым пайремлаш
погыненна. Ме землякна-влакын илышыштым
да пашаштым аклышаш улына. Марий калыкын
тÿвыражым, йылмыжым мондена гын, ме калык
семын йомын кертына. Сандене самырык тукым
кугурак-влакын примерешышт кушшаш манын
каласен кодем, - ойлен шке выступленийыштыже
верысе школ директор Вячеслав Алексеевич
Салмиянов.
Чынак, Гурий Гаврилович Кармазин калыкшым
волгыдо илышыш лукшаш верч шуко тыршен.
Йылмыштат, фольклорыштат марий калык шке
тÿсшым йомдараш тÿҥалмыжлан шочмо калыкын
патриотшо, шымлызе чотак тургыжланен. Икманаш,
тиде Эшым мландын эргыже Гурий Гавриловичын
(Кутлукай Ибаев) илышыжын тÿҥ цельже
улмаш.
Пайремым вÿдышö-влак район администраций
вуйлатышын социальне йодыш шотышто алмаштышыже
В. М. Андреевлан мутым пуэныт.
- Лÿмлö сотемдарче марий калык коклаште
кумдан палыме улеш. Но ту жапыште проста
кресаньыкын икшывыжлан айдемыш лекташ
йöн уке лийын. Сандене Кутлукай Ибаев ортодокс
тыным налын, Эшым ялысе ик классан вес калык
гыч лекше-влаклан училищым тунем лекмеке,
Пÿрö вес калык гыч лекше-влаклан школыш
тунемаш пурен. Ты пагыт гыч тудын илышыже
йöршын вестÿрлемын, - ойлен В. М. Андреев.
Тыгак тудо марий калыкын культурыжым,
йÿлажым саклен кодышашлан эртарышаш мероприятий-влак,
пашаште вашлиялтше нелылык-влак нерген
каласкален да погынышо-влакым тыгай чапле
пайрем дене саламлен.
Палемден кодаш кÿлеш, район администраций,
историй-тÿвыра рÿдер марий калыкын культурыжым
арален кодышашлан шуко ышта. Мутлан, марла
книга-влак савыкталтыт, тÿрлö мероприятий
эртаралтеш, тÿвыра шарныктыш-влакым саклен
кодышашлан окса ойыралтеш. Ты пашам шке
шочмо калыкым, йылмым йöратыше еҥ-влак
деч посна шукташ ок лий, шонем. Тыгай еҥ-влак
коклашке Эшым школ директор В. А. Салмияновым
пурташ лиеш. Тудо сотемдарчын шочмо верыштыже
полышкалышыже-влак дене пырля Гурий Гаврилович
Кармазинлан лÿмлымö тоштерым почын. Тушто
тудын илыш корныжо да шуко йыжыҥан шымлыме
пашаже нерген шуко материалым поген. Тудын
илыме пöрт ончылныжо шарныктыш оҥам пижыктыме.
Тунемше, туныктышо, ял калыкын полшымыж
дене ямдылыме пайремат тудын шуктымо пашаже
нерген ойла.
Тунемше-влак нерген поснак палемден кодыде
ок лий. Нуно погынышо-влаклан оҥай концерт
программым ямдыленыт. Инсценировка-влакым
ончыктеныт, почеламутым лудыныт, пошкырт,
марий калык куштымашым куштеныт. Пошкудо
Тöҥгак ял гыч “Алан” мурышо ансамбль Кармазинын
Чорай кундемыште погымо икмыняр мурыжым
муралтен (чылаже тудо 500 утла мурым поген).
Ты школышто тунемше-влак чыла могырымат
талантан улыт дыр. Школышто туныктышо Вениамин
Сергеевич ден Владимир Вениаминовичын
вуйлатымышт почеш ончер ышталтын. Тыште
мо гына уке: моторын тÿрлымö, крючок дене
пидме шовыч, пу гыч ыштыме тÿрлö ÿзгар ден
шкатулка-влак...
Ты кечын уна-влак самырык тукымлан шуко
поро шомакым ойленыт. Лÿмгече вашеш школлан
шуко пöлекым кучыктымо.
А. ГРИГОРЬЕВА
Важ: "Келшымаш"
газет
|