Марий кугыжаныш театрын - у тÿҥ режиссер

03.09.07

Самырыкын кöргö куатшат шукырак

Марий Элын сулло артистше Роман Алексеевым шукынжо уста актер семын ужын тунемыныт. 1998 ийыште Москваште М.Щепкин лÿмеш театр училищын марий студийжым тунем лекмеке, роль почеш рольым чоҥен, артист семын ий гыч ийыш калыкыште пагалымашым сулен тольо. А шукерте огыл тудым М.Шкетан лÿмеш национальный драма театрын тÿҥ режиссержылан шогалтыме.

- Роман Юрьевич, очыни, тыге каласаш гын, чын лиеш: марий искусствышто тый лÿмлö режиссер-влак Сергей Иванов, Алексей Маюк-Егоров семынак тÿҥ режиссер пашаш самырыкнекак ушнышыч. Но творчествыштет тиде шоныдымо-вучыдымо ошкыл огыл, очыни. Эше икмыняр ий ончычак Москвашке режиссерлан тунемаш пурышыч, кызытат тушто келге шинчымашым погет. Театрлан тау, тылат тыгай йöным ыштен.

- Чынак, мыланем илышыштем тыгай йöн лектын: ынде икмыняр ий, театрыште актер паша деч кÿрылтде, Москваште Б.Щукин лÿмеш высший театр училищыште режиссер семын мастарлыкым шуарем. Туныктышем - моткоч лÿмлö режиссер, профессор, Российын калык артистше Леонид Ефимович Хейфец. Тиде - моткоч лÿмлö режиссер, ятыр ий Совет Армий театрыште ыштен, кызыт педагог семын ышта. Тудо режиссер Мария Кнебельын тунемшыже, моткоч шуко спектакльым Российыште, тыгак вес эллаште шынден. 
   
Айдемылан опыт иканаште огеш тол. Тÿҥ режиссерын ответственностьшат кугурак. Спектакльым шындыме дене гына от серлаге. Репертуарлан тÿрыс мутым кучыман. Но самырык улам манын öрман огыл. Кунам-гынат тиде лийшаш ыле.

- Тений рÿдö марий театрыште спектакльымат шынден ончышыч. "Блин-2" маналтеш. Театровед, актер-шамычет, зритель тудлан сай акым пуэныт.

- Тиде мыйын режиссер семын шындыме икымше спектаклем ыле. Пьесын авторжо - Алексей Слаповский, моткоч чапланыше драматург. Тудын произведенийже негызеш спектакль-влак Российысе моло театрыште шындалтыт. Тачысе илышлан келшен толшо йодышым тарватыме дене зрительын кумылжым налеш.

- Тый режиссер должностьыш кусненат гынат, артист семын рольым модмым от кудалте, очыни. Спектакльлаште эре гаяк тÿҥ рольышто ужынна да ужаш тÿҥалына. Лывырге кап-кыл, пластика дене манына, моло деч ойыртемалтат.

- Марий артист-шамыч ты шотышто ончычат ойыртемалтыныт. Ойлат, Илья Россыгин пеш тале улмаш.

Южгунам от шиж: актер ала рольжым, ала шкенжым модеш. Тыгай айдемым ончаш моткоч оҥай.

- М.Шкетан лÿмеш театр тений у тургымым могай спектакль дене почаш шона? Репертуарыште могай у паша-влак лийыт?

- Тургымым октябрьыште "Салика" дене почаш палемдыме. У паша шотыштат ойлаш лиеш: режиссер Алексей Ямаев Сергей Григорьевич Чавайнын пьесыж почеш "Мÿкш отар" драмым шында. Тиде пьеса шке жапыштыже тÿҥ режиссерлан Россий искусствын сулло деятельже Сергей Иванович Иванов ыштыме годым театр сценыште 35 ий почела ончыкталтын, калыкым куандарен. Садлан ты спектакль репертуарыште лийшашак. Рольым модаш тÿҥалыт: Пöтырым - Российын сулло артистше Иван Смирнов, Корий кугызам - Марий Элын калык артистше Олег Кузьминых, Клавийым - Марий Элын сулло артисткыже Светлана Строганова ден Людмила Казанцева, Епсейым - Эдуард Яковлев, Андрей Малинов. Мылам Мичийын образшым почын пуыман. Кызыт репетиций-влак эртат.

- Очыни, ончыкыжо у спектакльым режиссер семын шындаш шонымаш уло?

- Шушаш ийын Щукин лÿмеш высший театр училищым режиссер семын тунем лекшаш улам. Диплом спектаклем Марий театрын сценыштыжат шындаш тÿҥалам.

- Манмыла, але чыла ончылно. Сайжым гына тыланыме шуэш.

- Пеш кугу тау. 

Ю.Григорьев

Важ: "Марий Эл" жаплышташ