"Мурызо Эчанын" йÿкшö йоҥгымым чарна

24.09.07

Марий Эл радион поро йолташыже-влак тудын ик вÿдышыжö Александр Кожевниковын, вес семынже "мурызо Эчанын", йÿкшым ончыкыжо идалыкат пеле огыт кол. Могай амал дене? 22 октябрьыште Саша армийыш кая. Тиде увер тыланда гына огыл, мыланнат моткоч вучыдымо лийын, сандене кайымыж деч ончыч тудын дене икмыняр мутым вашталтен кодаш лийна.

- Саша, тиде уверым шкеже кузе вашлийынат?

- Ласкан. Армийыш кунам-гынат садак каем манын паленам.

- А молан кызыт марте наҥгаен огытыл, вет вашке 24 ийымат темет?

- Йочам изи лийын. 22 июньышто Лиза ÿдырем кум ийым теменат, тевыс, военкомат гыч повесткым налынам. Кызытеш ракетный войскашке колташ палемденыт.

- Тугеже Йошкар-Ола воктене улшо тыгаяк войскан частешыже коден кертыт?

- Тушко погаш тÿҥалыт да вер лиеш гын, кертыт. Мый ешан, шочшан улам, сандене такшымат Урал деч умбаке наҥгайышаш огытыл.

- Чон почын ойлаш гын, иктаж амалым муын кодаш шонымашет лийын огыл?

- Уке. Молан кÿлеш? Амалым кычалмаш - уто паша, вуйым арам корштарымаш. Но палымем-влак кокла гыч иктышт "армийыш мом коштат?", весышт "миен тол, чын пöръеҥыш савырнет" маныт. Мый шкеже рвезе армийыш миен толшаш манын шонем.

- Тый денет пеҥгыде кыл лийын: мый тыйын эртарыме хит-парадетым кажне гана "Чарша шойыч" страницышкем вераҥденам. А ынде "мурызо Эчан" олмеш кö лиеш?

- Хит-парадым, очыни, Рауль ямдылаш тÿҥалеш.

- Таче пытартыш кече пашам ыштет. Радиом колыштшо-влаклан мом ойлен кодет?

- Таче кастене тыгак ойлем: "Тиде - мыйын пытартыш эфирем. Вучыза, идалыкат пеле гыч пöртылам". Но Марий Эл радио дене кылна огеш йом, шонем. Тушко мый Интернет гоч серышым возаш тÿҥалам.

- Тугеже службет сайын эртыже, Саша. Элнам тÿткын ороло да арале!

- Тау.

Л.Камалетдинова

Важ: "Марий Эл" жаплышташ

Д.Речкинын фотожо.