Изи Регеж изи ида ман, Регеж Васли тыште шочын…

Тыгай мурсавыртыш дене саламлышт шуматкечын М.Шкетан лÿмеш театрын сценыштыже артист да писатель Василий Михайлович Регеж-Гороховым шочмо кундемже гыч толшо родыжо-влак.

Йывансола ялысе "Мурсескем" ансамбльын сылне ватыже-влак, шÿвыр-тÿмыр йÿк почеш шыман кушталтен, мокталтен муралтен, шке йöратыме эргыштым, кугешнен илыме айдемыштым семалышт. 

Тидлан амалжат изи огыл ыле. 27 августышто Василий Михайловичлан 70 ий темын. 

Марий Сандалык 2007 ийым Регеж-Гороховын идалыкше семын эртара. "Марий Эл" газетнат идалык мучко Василий Михайлович нерген ятыр ойым савыктыш, возымо книгаж-влак нерген каласкалыш. Писатель шкежат ик гана веле огыл шонен илыме куан-ойгыжым, почеламутлажым лудшылан ÿшанен пöлеклыш. 

А М.Шкетан лÿмеш театрысе вашлиймаш йöратыме артистлан, пагалыме писательлан тауштен вуйым савыме семын эртыш. Кеҥеж кыдалне увертарыме "Марий Эл Республикын калык писательже" лÿмым пуымо нерген указым Марий Эл Правительство вуйлатышын алмаштышыже, тÿвыра, печать да национальность паша шотышто министр М.З.Васютин илышыш шыҥдарыш. Василий Михайловичын оҥыштыжо у пале ешаралте.

- Шергакан Василий Михайлович! Вася манам гынат, нелеш от нал дыр. Тый ынде чынак шергакан улат. Тидым таче налме чап лÿметат пеҥгыдемда, - каласыш пырля тунемме йолташыже, Российын сулло артисткыже Галина Иванова-Ямаева. - Шочмет годым тыйын вуйлепетым, очыни, Юмо шупшалын. Мом гына шыч ыште илышыштет: артист семын калыкым куандарышыч, почеламутым возышыч, драматург семын тыршышыч, ынде кусарыше семын чапланет. Пиалан лий!

Лÿмлö артист-влак Л.Бочкарева, С.Сушкина, И.Смирнов, З.Берникова, С.Дмитриева, О.Харитонова, Р.Макарова да молат сылне йÿкышт дене поэтын мутшылан возымо семым йоҥгалтарышт. 

Чапланыше айдемын илыш корныжым видеоролик-влакат шарныктышт. 

А Марий Элын сулло артистше Олег Логиновын йоҥгалтарыме "Элнет" мурыжым калык шÿм шулен колышто. Саламлымаш ныл шагат наре шуйныш гынат, чыла кумылан-влак сценыш лектыч манаш огеш лий.

Таче Марий тÿняштына Василий Михайлович гай айдемын кÿлешлыкше моткоч раш шижалтеш. Куатле да келге шинчаончалтышан артистын, эртыше да тачысе илыш йогыным виктарен моштышо писательын калыклан каласышаш мутшо ший памашла шоҥешталтеш.

Кугуракым пагален илаш кÿштымö кугезе сугыньым калыкна шарна да ончыкылык тукымланат тыгаяк аралалт кодаш тылана.

Зоя Глушкова

Д.Речкинын фотожо. 

Важ: "Марий Эл" жаплышташ