Марий тиште кече поэзийлан пöлеклалтеш

07.12.07

Эше икмыняр жап ончыч мо тыгай Марий тиште кече манын йодмылан шукынжо вашештен кертын огытыл. Ий еда ынде тудын нерген утларак да утларак ойлалтеш, палыме веле огыл, кугыжаныш кÿкшытан пайремыш савырна. 

Вет тиште кеч-могай калыкланат эн ончычак наций семын ойыртемалтын вияҥашыже йöным ыштен. Таклан мо сылнымутым калыкын могай кÿкшытыштö улмыжлан акым пуышо ик пале семын ончат. 

Марий тиште кечылан пöлеклалтше республик кÿкшытан пайрем-погынымаш-влак тений декабрьын икымше кечылаж гычак тÿҥалыт. 

Мутлан, республикысе йоча библиотека 1-15 декабрьыште "Марий книга - ойырен налыт, лудыт, акым пуат икшыве-влак" акцийым эртара. Туштак 10 декабрьыште марла сылнын лудмо шотышто шкешотан таҥасымаш лиеш. Валентин Колумб лÿмеш самырык-влак библиотекыште 6 декабрьыште "Тамга гыч книга марте" выставка пашам ышташ тÿҥалеш. Тудак "Марий Элысе самырык-влак" библиографический указатель дене палдарыме пайремым темла. 

Лудмывер-влакын тиде корно дене пашаштышт ик эн кугу верым, мутат уке, Сергей Чавайн лÿмеш национальный библиотек налеш. Тудо Марий электрон библиотекым ыштен, 10 декабрьыште тудым лудшо-влаклан икымше гана ончалаш йöным ышта.

Марий тиште кечылан пöлеклалтше сылнымут да сылнысем кас 10 декабрьыште М.Шкетан лÿмеш Марий кугыжаныш драме театрыште лиеш. 

Тÿвыра, печать да национальность паша шотышто министрын алмаштышыже Галина Ширяеван вуйлатыме оргкомитет тенийлан веле огыл пайрем программым ямдылен, тиде пайремын лишыл жаплан рÿдыжымак палемден. Тÿҥ шонымаш - тудо кажне ийын ойыртемалтше лийшаш, калык чонеш да ушеш шÿм-чоным пойдарыме пайрем семын кодшаш. 

Тыге, тений Тиште кече марий поэзийлан пöлеклалтеш. Молан лачак тиде жанрым ойырен налме? Чыланат палена, марий сылнымут С.Чавайнын "Ото" почеламутшо гыч тÿҥалтышым налын, литературылан шочашыже, вияҥашыже корным ыштен. 

Ты кечын рÿдö марий театрын сценыштыже марий сылнымутын эртыме корныштыжо пале кышам кодышо поэт-влак нерген чапландарыме шомак йоҥгаш тÿҥалеш. А таче илыше да пашам ыштыше-влак иквереш калык ончыко лектыт. Кунам эше тыге нунын дене вашлияш йöн лиеш?

С.Белкова

Важ: "Марий Эл" газет