"МариStar" марий муро почеш кушташ кумылаҥда

10.01.08

Газетнан тиде номерже пÿтынек гаяк шушаш У ийлан пöлеклалтын. Ты амалым шотыш налын, таче тендам эн ойыртемалтше, калыкыште ик эн шуко мутланымашым лукшо группа дене палдараш лийна. Тыгайжылан ме "МариStar-ым" шотлышна. Таче группын вуйлатышыже Вильсур Хамеев дене мутланымынам темлена.

- Вильсур Эдуардович, Тендан кок группыда уло. Молан эше иктым чумыраш шонен пыштенда? Тидыже ешартыш тургыжланымаш, вуйым корштарымаш огыл мо?

- Тургыжланаш, шонкалаш, тÿрлö нелылыкым сеҥаш тыршаш ом тÿҥал гын, вигак шоҥгемам, очыни. Тидын деч посна мый иленжат ом керт.

Тыгай группым чумырымо нерген шонымашлан шочаш Марий Эл радиом почмо шÿкалтышым ыштен. Мöҥгыштö тудым эре колыштам. Мылам келшыше рушла муро ятыр уло. Молан нуным марлаҥдаш огыл, шоненам. Дискотекыште рушла, йот йылмыла дене йоҥгалтше муро почеш еҥ-влак куанен куштат, а марла муро йоҥгаш тÿҥалмеке, кораҥ ошкылыт. Тыгай койышым нигунам умылен омыл. Сандене марлаҥдыме мурына-влак дене меат самырык-шамычым шочмо йылмылан утларак шÿмаҥдаш, дискотекыште марий муро-влак почеш кушташ вожылмым чарнаш полшаш шоненна.

- "МариStar" "марий шÿдыр" але "марла тошто муро" манмым ончыкта?

- "Марла тошто муро". Да, сайын каласышда. Тидын нерген мый эше шонен омыл ыле. Шкеже тÿҥалтыште марла мурышо "Полярная звезда" группым ышташ шоненам, да группа лÿм йымалне тыгак возымо лийын: "У марий "Полярная звезда". Вара "марий" ден "звезда" мут-влакым гына кодымо, кокымшыжым англичанла каласыме. 

- Группыш рвезе-влакым кузе ойырен налында?

- Эн ончычак нуно марий еҥ, марла мутланен моштышо лийшаш улыт ыле. Тÿҥалтыште группышто марла умылышо, но мутланен моштыдымо оласе рвезе-шамыч лийыныт. Вараже содыки ялысе-влакым чумыраш шоненам. Тыге кызыт ик курык марий, кум олык марий рвезе-влак улыт. Икте вузышто тунемеш, кумытынжо кыдалаш образованийым налаш ямдылалтыт. Тыгак рвезе-влакын йÿкыштым колыштынна. Психологий велым икте-весыштлан келшен толмымат шотыш налынна. Теве "Полярная звезда" группысо рвезе-влак кызытат иза-шольо гай улыт.

- Шукерте огыл эртаралтше "Марий шыже" фестивальым почмаште изирак концертым ончыктымышт годым рвезе-влакын сценыште шкеныштым кучымышт, чиен лекме вургемышт мылам келшен огыл ыле.

- Тиде статьяда нерген мылам шукын ойленыт. Нунын ончылно тыгай задачак шоген. Рвезе-влак сценыште рольым модыныт.

Вургем нерген ойлаш гын, чот чаплын чиктен лукташ кызытеш оксана уке. Нуно чыланат ял гыч улыт. Иктыжынат ача-аваже чот поян огыл. Сандене кажныжын улшо вургемже гыч эн сайжым ойырен налын, сценыш лукташ пернен. Икмыняр жап гыч тугай костюмым ургыктена, рвезе-влак тугай чапле вургем дене лектыт - öрыда! А кызытеш мо дене кертыт, тудын дене лекташышт перна.

- Кугу сценыш икымше гана лекмышт годым моткоч ойыртемалтшын чиеныт ыле...

- У группым чумырымо гын, ала-мом уым, молын деч ойыртемалтшым ыштыме шуын. Марий Эл радиолан кок ий темме лÿмеш концерт кече лишемын, тушто рвезе-влакын чурийыштым шылташ шоненна, а образ тÿрыс ямде огыл. Тыге чурийыштым чиялтен лукташ шонымаш шочын. Вургем денат тыгак лийын. Мо дене лектыт? Икана урем дене ваштарешем суворовец ошкылеш. "О, теве нунылан могай вургемым чиктыман!"- шоналтенам тунам. Тыге ик школ гыч кадет формым жаплан налынам.

- Могай рушла мурым марлаҥдышашым шке ойырен налыда?

- Тÿҥ шотышто - мый. Но рвезе-влакат шканышт келшышым темлат.

- Руш муро-влакын авторышт дене умылыдымаш лектын кертеш манын огыда шоно?

- Ме концертлаште кажне мурын авторжым ойлена, сандене умылыдымаш лекшаш огыл. Адакшым нуным чапландаренас. Тугеже могай умылыдымаш лийын кертеш? Куанышаш гына улыт.

- Пытартышлан теве могай йодышым пуынем. Тудо еҥ-шамычым ик эн чот тургыжландара, очыни: рвезе-влакын чурийыштым тÿрыс калык кунам ужеш? Але нуно эре петырыме чурий дене лекташ тÿҥалыт?

- Кызытеш тыге, маскым чиен. Санденак кö, могай лÿман да фамилиян улмыштым тачат ынем ойло. Шушаш ийын иктаж шыже лишан чурийыштым почына да рвезе-влак дене палымым ыштена.

Любовь Камалетдинова

Важ: "Марий Эл" газет