«Марла Шатунов» Эстонийыш миен толнеже

25.03.08

Марий эстрадыште у лÿм-влак шочынак шочыт. Кö, кушеч улмым еҥ-шамыч паленат огыт шукто. Тидым шотыш налын, таче ик у мурызо дене палымым ыштена.

Тиде - Слава Сладков. Тудо - Советский район, Шнаран села гыч. Палантай лÿмеш тÿвыра да сымыктыш колледжын дирижер-хор пöлкажым пытарен. Тиддеч вара шочмо селаштыже верысе тÿвыра пöртыштышт пашам ыштен. Туштыжо эше школышто тунеммыж годымак эртаралтше концертлаште Андрей Губинын, "Ласковый май" группын мурыштым рушла мурен. Кодшо ийын Йошкар-Олаште Олан кечыже пайрем годым лач нуным йоҥгалтарымыжымак К концерт компанийын продюсерже колын. Рвезын йÿкшö, сценыште шкенжым кучымыжо келшен да продюсерже лияш келшымыж нерген ойлен.

- Тиде тылат кава гыч камвочшо пиал семынак чучын, очыни?

- Туге. Шнараныште ик турфирма уло. Тудын гоч мемнан деке Америке, Франций, моло йот элла гыч еҥ-шамыч турист семын толедат. Ятыр гана нунын ончылно мураш пернен. Лач тунамак иктаж-кудыжын шинчашкыже логалаш шоненам. Ончыкылык продюсеремым нунын коклаште кычалынам. Но, тевыс, йöршеш вучыдымын тудо мыйым олаште шекланен. Мутат уке, тидлан моткоч куаненам, вет мый олашке пашам ышташ куснаш шукертсек шоненам. Тыште шкем ончыкташ йöн ятырлан шукырак. Кызыт Сеҥымашын ХХХ идалыкше лÿмеш тÿвыра полатыште йÿк режиссерлан ыштем.

- Тый моткочак ойыртемалтшын да куштылгын куштет. Тидлан лÿмын иктаж-кушто тунемынат мо?

- Нигуштат посна тунемын омыл. Моло-влакын кузе тарванылмыштым телевизор дене ончен кушташ тунемынам. Воштончыш ончылнат шуко шогылтынам. Школышто тунемме годым пайрем-влак вашеш ямдылыме концертлан эсогыл класслан куштымашым шынденам. Тунамак верысе тÿвыра пöртыштына шкемын кок эстраде коллективем лийын. Иктышкыже изирак ийготан-влак, весышкыже кугурак-шамыч коштыныт. Ме вес районлашкат концерт дене лектеденна.

- Тый кусарыме муро-влакым йоҥгалтарет. Но вет Юра Шатуновын мурыжо-влакымак эше ик группа мура…

- Продюсерна-влак мутланен келшеныт: тиде группа дене ме ик мурымак мураш огына тÿҥал. Лишыл жапыште мый "Руки вверх!" ден Дима Биланын эн чапланыше мурыштым марла йоҥгалтараш тÿҥалам.

Шукерте огыл икымше сольный альбомем лектын. Тушко пÿтынек кусарыме муро-влакым чумырымо. Кызыт кокымшылан материалым погена. Тушто марий композитор-влакын: Иван Егоровын, Сергей Маковын, Влад Николаевын - лÿмын мылам возымо мурышт лийыт.

- Тыйын поклонницет-шамычат ынде улыт дыр?

- Улыт, но тунар шукынжак манын ом керт.

- А келшыме ÿдырет?

- Уке. Мый шкеже ола гыч иктаж марий ÿдырым вашлийнем.

- Марла сайынрак мутланаш туныктыжо манын, очыни?

- Тыгерак (шыргыжеш).

- Эн кугу шонымашет могай?

- Кызыт тыгайже ынде уке. Ончыч лийын, но тудо, тевыс, шукталтын - мый олаште пашам ыштем, продюсерем уло. Мо нерген эше шонкалаш? Москошко кайыме нерген? Тушто руш мурызо-влак тугакшат ситат. А марий мурызо семын чотшак от чаплане. Йÿд клублаште мураш жапын-жапын миен толаш лиеш.

- Москошкыжо уже миенат мо?

- Миенам. Ик гана веле огыл. "НТВ" каналын кусарыме муро нерген сюжетым сниматлаш толмышт годым Москосо уна-влаклан мурымем келшен. Мöҥгышкышт мийымекышт, тудын нерген йолташыштлан, палымыштлан ойленыт, коеш. Нунак вараже шке рестораныштышт мураш ÿжыныт. Тушто мыйым иностранец семын акленыт да моткоч сайын вашлийыныт. Ончыкшым йот эллашке, Эстонийыш, Финляндийыш, миен толаш продюсеремын шонымашыже уло. Тушто марий мурызо-влакым моткоч йöратат, маныт. 

Любовь Камалетдинова
мутланен

Фотом альбомжо гыч налме

Важ: "Марий Эл" жаплышташ