«Йывырте» йывырташ да шонкалаш таратен

01.04.07

Классика сынан музыкын Юл кундемысе регион-влак кокласе икымше фестивальже 25-27 мартыште Йошкар-Олаште эртен. Тудым «Йывырте» манын лÿмденыт. 

Тиде марий профессионал музыкылан тÿналтышым пыштыше Иван Ключников-Палантайын «Йывырте» произведенийже дене кылдалтын гын, мероприятий Иван Степановичын суапле пашажлан пöлеклалтын. 

А кугу пайремын участникше-влакым Палантай лÿм денак кылдалтше тунемме вер - Марий Элысе тÿвыра ден сымыктыш колледжын академический музык факультетше - вашлийын. Тудым эртарен колташ Республикысе тÿвыра, печать да национальность паша шотышто министерство полшен. 

Тиде шонымашым икмыняр ий ончычак Озаҥысе Назиб Жиганов лÿмеш кугыжаныш консерваторийын профессоржо, мемнан землякна Александр Маклыгин темлен. Тыге тудым таче консерваторийын полшымыж денат илышыш шындарыме да ончыкшым йÿлашке пурышо мероприятийыш савыраш ÿшан уло. 

Мутлан, вес ийын тыгайым Ижевскыште эртараш шонат. «Вет кызытсе саманыште, мом шылташ, тÿҥ шотышто попсовый музык але эстрадe озалана, - шÿм-чон вургыжмашыжым почо И.С.Палантай лÿмеш тÿвыра ден сымыктыш колледжын директоржо Алексей Кленов. - Чÿчкыдын сценыште лушкыдо сем-влак йоҥгат. Тидын деч шерат темеш, да кокланже (кöлан чÿчкыдынракат) классика мурым колмо шуэш. Тудым, чаманен каласаш логалеш, пытартыш жапыште пеш шуэн колыштына. Теве радио денат шагал шокта. Тудым шагал возат. А вет самырык тукымым воспитатлымаште тыгай музык моткоч кÿлешан». 

Таче Марий кундем опер, балет, театр сымыктыш дене вес регионышто да йот эллаштат чаплана. Ынде оркестр культурымат нöлташ жап шуын, векат. Тидлан «Йывырте» фестиваль шагал огыл шÿкалтышым ыштен. Тений тушто тÿҥ шотышто Озаҥ консерваторий шке мастарлыкшым ончыктен. Тушеч шуко саскале ештÿшка, профессор-влак толыныт, кум кечыште нуно мастер-класс ден репетицийым эртареныт, лекцийым лудыныт. Тиде колледжысе туныктышо-шамычлан квалификацийыштым нöлташ полшен. 

Тыгак фестиваль годым «XXI курымысо музык туныктежын йöстыкшö-влак» темым шанче-практик конференцийыште авалтеныт. Таче, илышышке шуко вашталтыш, у койыш шыҥыме саманыште, сай йÿлам кузе арален кодаш? Студент-влак дене кузерак пашам виктараш? 

Шийвундо, кадр шотыштат йодыш-влакым рашемдаш кÿлеш. Вет, мутлан, Республикысе тÿвыра ден сымыктыш колледжыште кызыт туныктышо кокла гыч 60 процентше пенсийыш лекшаш улыт. А тиде тунемме верыште музыкчо лияш шонышыжо моткоч шагал. Молан? Шукыжо тиде аланыште тыршыше-влакын изи пашадарышт дене кылдалтын. Консерваторийым пытарымекат, пеш шагалже мöнгеш шочмо кундемышкыже пöртылеш. Тыште илыме вер йодышат пÿсын шога. 

«Йывырте» фестиваль Юл кундемысе федерал кундемын тÿрлö регионжо гыч тÿвыра министр-влак ден нунын алмаштышыштым, музучилищын директоржо ден алмаштышыжым, тÿвыра пашаеҥ-влакым кумда паша погынымаште чумырен. Тыште Марий Элысе тÿвыра, печать да национальность паша шотышто министр Михаил Васютинат участвоватлен. Тиде погынымаште тÿрлö йодышым каҥашеныт. Теве музшкол, училище да колледж-влакым Тÿвыра министерство пеленак кодаш кÿлмö нерген ойленыт. 

Тунамак теорий ден фортепиано пöлка-влак олимпиадым эртареныт. Тушто Татарстан ден Чуваш республикыласе да Киров ден Ижевск олаласе музык тунемме вер гыч студент-влак шке мастарлыкыштым тергеныт. А кажне кастене концерт-влак лийыныт. Тыге классика сынан сылне сем марла, рушла, татарла, украинла йонген да шÿм-чоным, чынже денак, йывырташ таратен.

Эльвира КУКЛИНА