Шкем öрдыж гыч ончалман
15.05.07
 Регион-влак
кокласе "Марий ушем" мер организацийын
отчет да сайлымаш конференцийже деч вара
мер организацийын ончыкылыкшо верч тургыжланыше
кажне еҥ шке ой-каҥашыжым темлаш вашка.
Марий кундемыште сайын палыме мер пашаеҥ,
Башкортостанын рÿдö олаштыже илыше С.Новиков
Йошкар-Олашке чÿчкыдынак толын коштеш,
тÿрлö погынымашлаште шке шонымашыжым луктын
ойла. Тусо "Марий ушемын" шолдыргымыжлан
чонжо йÿла, вет ынде эрвел марий-влакын
рÿдö кундемыштышт, кушто лÿмлö марий мер
организаций 90 ий ончыч шочын, ты ушемыште
48 еҥ веле кодын. Туге гынат Йошкар-Олаште
эртыше конференцийыш кум делегатым колташ
йöным муыныт. Могай шонымаш дене вара нуно
пöртылыныт? Мут - делегаций вуйлатыше Семен
Новиковлан.
- Конференцийым вÿден моштыдымо öрыктарыш,
- каласыш Семен Сергеевич. - Лекше умылыдымашым,
öпкем кораҥдыме корнылам рашемдаш тыршыме
олмеш икте-весым лÿмдылмаш, игылтмаш веле
озаланыш. Тыгай уда койышым икымше гана
огыл вашлийынам. Амалжым почаш тыршен ончем.
Эн ончычак, марий-влак коклаште кажныже
шкенжым Юмылан шотлымо койыш шижалтеш.
Весе, чиновник-влак коклаште марий тÿвыра
ваштареш шогышо, шке калыкын пÿрымашыжым
шотышкат налдыме-влак вашлиялтыт. Тидым
тыге умылыман: вет нуно эн ончыч шке вуйлатышыштын
кÿштымыжым шуктышаш улыт, а мер организацийын
шонымашыже керек.
Умылыдымашым кораҥдаш мер организацийын
Уставышкыже вашталтышым пуртен, кум сопредседательым
сайлаш темлышт. Иктыже культурым вияҥдымылан,
весыже кÿшыл кучем дене кылым ыштышашлан,
кумшыжо организационный пашам шуктышашлан
вуйын шогышаш ыльыч. Но шукынжо тидын ваштареш
йÿклышт. Тыгеже "Марий ушемыште" икте-весым
колышташ, вес шонымашлан корным пуаш тунем
шуын огытыл. Тидыже кучем орган ден мер
организаций коклам утыр гына тора. Сандене
шонымаш шочеш: пырля келшен пашам ыштышаш
олмеш, мер организацийым вуйлатышылан
шогалын, тудым йöршын шалаташ тыршат. Тидыже
моткоч лÿдыкта.
Ваш-ваш умылыдымаш вияҥмын вес амалжат
уло. Тиде - чимарий-влакын "керемет" мутыштым
тÿрлö семын умылымаш да кажныжын шке семын
кучылтмыжо. Эрвел марий-влак тудым вуйлатышылан,
кугыжалан шотлат гын, курык марий ден олык
марий-влаклан - тушманле вий. (Такшым ХV-ХIХ
курымлаште тыгак шотлымо). Кок семын умылтарымылан
кöра калыкыште, кучем органыште икте-весыштым
"керемет" манын лÿмдылыт. Марий шанчызе-влак
тидын шотышто калыкна ончылно парыман
улыт. Южо мутым тÿрлö семын умылымылан
кöра тыгай шонымаш лектеш.
Конференций годым весат палдырныш: тышке
тÿҥ шотышто Йошкар-Ола да лишыл регионла
гыч гына погыненыт. Молан манаш гын öрдыж
кундемла гыч толшо делегат-влакын ни шужен
шинчымыштым, ни мöҥгеш кайышаш транспортыш
вашкымыштым шотыш налын огытыл. Икте-весыштым
лÿмдылын, öпкештым "туарен", ÿчашен, нигöлан
кÿлдымö муторгажыштым шуйкален, жапым
гына арам эртареныт. Ок лий ыле мо чыла
делегатлан ситышын докладым савыкташ да
конференций годым пуэдаш? Ӱчашышашда, умылыдымашда
уло гын, погыныза дискуссионный манме клубыш
да тушто пуредылза. Конференцийыште пашам
ыштыман, жапым 10 гыч тÿҥалын 17 шагат марте
шуйкалыман огыл.
Южо еҥ мер организацийын пашажым шылталаш
лÿмын гына толын ыле. Но 3-4 ийлан ик гана
конференцийыш толынат гын, кузе тудын пашажлан
акым пуаш тоштат? Лач тыгай-влак тугай пашам
темлат, кудыжым шукташ шкешт тореш улыт.
Тыге лиеш гын, ончыкыжым "Марий ушемын"
радамже йöршын шолдырга.
Иктешлен, теве мом каласынем: кунам шкенам
öрдыж гыч ончаш тунемына гын? Вожылшаш
лиеш манын лÿдына, очыни. "Марий ушем" мер
организаций пашам ыштыше да ончыкыжымат
шокш кергалтен тыршаш ямде еҥ-влак кÿшеш
вияҥын да чапым налын. Умбакыжат тиде корно
деч ок кораҥ гын веле лÿмнержым пöртылта.
Борис Шамиев
М.Скобелевын фотожо
Важ: "Марий
Эл" жаплышташ, 84 (22737) № 2007 ий 12 май
|