"Саликам" возышылан 100 ий темеш ыле

20.03.08

23 мартыште Марий АССР-ын калык писательже, драматург Сергей Николаевич Николаевын шочмыжлан 100 ий темеш. Тидын лÿмеш кодшо изарнян С.Г.Чавайн лÿмеш кугыжаныш книгагудышто "Сергей Николаевын драматургийже" тема дене йыргешке ÿстел чумырген.

Йошкар-Олан чапгражданинже Сергей Николаев Морко район, Овдасола кресаньык ешеш шочын. Арын шымияш школышто тунеммыж годым С.Г.Чавайнын вуйлатыме сылнымут кружокыш коштын. 

Калык ойпогылан, сылнымутлан шÿмаҥше самырык еҥын пÿрымашыже вес йогын дене вияҥын кертеш ыле манын шоналтыманат огыл. Шÿм-чонышкыжо легендым, преданийым, калык мурым, калык мыскарам курго семын погышо, шочмо калыкым, шочмо мландым йöратен перегыше айдеме илышын чыла тÿрлö куанжымат тичмаш кинде сукыр семын тамлен илен. 

Маркугтеатрын, Руш театрын сценылаштыште "Салика", "Вÿдшö йога", "У саска", "Лейтенант Огнев", "Шинелян ÿдыр", "Айвика" да эше моло ятыр пьеса-влак чарныдегеч ончыкталтыныт. 

Мер калыкын пÿрымашыжым тöрлен колтымаште чолгалык дене шÿлышö драматург тÿвыра да сымыктыш илышым вуйлатымаште ятыр тыршен, 1959-1971 ийлаште Марий АССР Тÿҥ Каҥашын депутатше лийын. Марий АССР сымыктышын сулло пашаеҥже, Марий АССР калык писательын сеҥымашыже-влак Марий АССР Кугыжаныш премий, Паша Йошкар Тисте, "Чап Пале" орден-влак дене палемдалтыныт.

Сылнымутым шымлызе-влак тудын мастарлыкшым аклыме годым эреак иктым палемдат: Сергей Николаевич "Салика" деч вара нимом ок возо гынат, курымешлан писатель лийын кодеш ыле. Нуно тиде пьесым В.Шекспирын возымыж дене тöр шындат. А авторын шымлу ияш лÿмгечыжлан, марий калык тудын "Саликажым" 700-шö гана ончен. 

Чыла тидын нерген шарналтышт С.Г.Чавайн лÿмеш книгагудыш чумыргышо сылнымутым, театр сымыктышым йöратыше лудшо, возышо, шымлыше-влак. Марий Элын калык артистше да писательже, мемнан чонышто Эчук семын шарналт кодшо В.М.Регеж-Гороховын муралтен колтымыжат тачысе тукымын кугу талантлан вуйым савыме семын лие.

Зоя Глушкова

Важ: "Марий Эл" жаплышташ