Йошкар-Олаште "Пеледыш пайремым" эртарат

10.06.08

12 июньышто Йошкар-Оласе тӱҥ каныме паркыште «Пеледыш пайрем» лиеш. 

Тудо 13 шагатлан Тулото аланыште тӱҥалеш. Уна семын Киров областьысе Пижанке районын «Ӱдыр кас», Удмурт Республикысе Грахово районын «Пеледыш» фольклор ансамбль-влак толыт. Марий Эл Республикым «Марий Эл», «Морко кундем», «Марий Памаш», «Шокто гармонь», «Чон оҥгыр», «Чувашеҥ» (Звенигово район, Чуваш отар ял) мастарлык кӱкшытышт дене куандараш тӱҥалыт.

Спорт площадке марий талешке-влакым шарныме лумеш «Пеҥгыде тазалык верч» программышке тале да чулым марий-влакым ӱжеш. Тудо шке пашажым 14 шагатлан тӱҥалеш.

15 шагатлан Эстрада аланыште йоча-влакым «Йоча – илышын куанже» программе вуча. Йоча-влак «Реве» йомакыш логалыт да тудын персонажше лийын сеҥат.

«Поян ешыштем – илышем чевер маке» программе «Ешын идалыкшылан» пӧлеклалтын. Тыште гармонь почеш, мурен-куштен, уло ешда, родо-тукымда дене каналташ йӧн лиеш. Тудо шке пашажым 16 шагатлан эстраде аланыште тӱҥалеш.

17 шагатлан эстрадым да сылне семым йӧратыше-влаклан «Шӱм пеледыш – муро сем…» программе «Пеледыш пайремым» мучашла.

«Пеледыш пайремын» эртыме радамже:

13.00 – «Пеледыш пайремым» айон (торжественно) почмаш. Пошкудо регион да марий Эл Республикысе фольклор коллектив-влакын мурсем пӧлекышт. (Тулото алан)

14.00 – «Пеҥгыде тазалык верч!» спорт дек кумылан-влаклан программе. (Тулото алан)

15.00 – «Йоча – илышын куанже» - йоча-влаклан программе. (Эстраде алан)

16.00 – «Поян ешыштем – илышем чевер мак» - марий сем да муро почеш каныме кас. (Эстраде алан)

17.00 - «Шӱм пеледыш – муро сем…» - эстраде концерт. (Тулото алан)

20.00 – «Россия – Марий Эл» - эстраде концерт. («Строитель» стадион)

Налмывер: Mari-el.name