Бухарестӹштӹ Европыштыш изи халыквлäн Федерал Ушемӹн  50-шӹ конгрессшӹ эртен

17.05.05

5-7-шӹ майын Румынин вуйхалаштыжы, Бухарестӹштӹ Европыштыш изи халыквлäн Федерал Ушемӹн (ЕИХФУ), Federal Union of European  Nationalities (FUEN) 50-шӹ конгрессшӹ эртен.

Ти ушемӹм 19-шӹ ноябрьӹн 1949-шӹ ин Ф-Версальышты Европыштыш изи халыквлäн дä диаспорывлäштӹ ӹлӹшӹ халыквлäн прававлäштӹм ӹшӹклäш манын ӹштӹмӹ. Ушемӹн тӹнг принципшӹ: цилä халыкын ӹлäш, туан йӹлмӹжӹ доно попаш, культурыжым виäнгдäш дä туан йӹлмӹм тыменяш праважы улы. 

Ик халыкынат весӹ анзылны яжорак ылына дä тäмдäн культура дон йӹлмӹдä мäмнäн гӹц хударак ылыт манаш праважы уке. Ти ушем шачмыжы годшен гуманизм, халыквлäн икӹжäк-иктӹм ынгылен мыштымаш дон шотеш пиштӹмäш верц ылын дä эдемвлäн прававлäштӹм, лӹмӹнок изи халыквлäн прававлäштӹм пыдыртымаш, культурышты дон йӹлмӹштӹм пӹзӹртӹмäш, социальный дä национальный признакан дискриминаци ваштареш ылеш.

Европыштыш изи халыквлäн Федерал Ушемӹн конгрессвлäжӹм цилäжӹ 50 гäнä эртäрӹмӹ дä 55 и лошты икäнäкäт эче кыце Совет Ушемӹштäт, тенгеок Россий Федерациштäт эртäрӹмӹ агыл. Тене 50 -шӹ конгрессӹштӹ Марий Эл гӹцäт хынавлä ылыныт - Марий Мер Кангашын вуйлатышыжы Владимир Козлов дон Финн-угр халыквлäн рвезӹлык Ассоциацин (ФУХРА, рушлажы МАФУН) вуйлатышыжы Василий Петров.

Владимир Козлов докладым ӹштен, кыдым ти сайтышты рушла лыдаш лиэш. Ӹнянӹмӹ шоэш, марынвлä изин-олен Европыштыш махань-шон организацивлä доно цаткыдырак кӹлвлäм кычаш тӹнгäлӹт. Техень контактвлä куштылгынарк лиштӹ манын, марынвлäлäн англ йӹлмӹмäт пäлäш уты агыл. Тидӹ лӹмӹнок ӹдӹрвлä дон ӹрвезӹвлäм тӹкäлеш, вет нӹнӹ Марий Элӹн толшашыжы ылыт. 

Валери Аликов