У марий радио Интернетыште мер илыш нерген ÿчашымашым тарватен

17.03.08

Март тылзын Интернетыште «Мер Ой радио» ышташ тÿҥалын. Тиде радиом почаш марий мер толкынын чолгаеҥже Анатолий Смирнов темлен ман воза Mari-el.name сайт.

«Мер Ой радион» икымше передачыжым mp3-файл семын шупшыл налын колышташ лиеш.

Передачыште Анатолий Смирнов Марий калык погын да Мер каҥаш нерген ойла. Тудо марий мер толкынын пашажым вес семын вораҥдарен колташ темла.
 

Patyr лÿман еҥ Смирнов дене ок келше да шке шонымыжымым воза:

Пеш кугу тау марий радиом Интернетыш лукмылан, колыштым. 

Ынде господин Смирновын ойлымыж шумлык. "Ме марий калык ик оян лийшаш улна" ман ойлышо-влак дене ом келше. Таче ме 21 курымышто илена да марий-влакше уло туня мучко шарлен пытеныт. Марий калык посна еҥ гыч шога, кажне марий еҥ шке шотан, вес еҥ деч ойыртемалтше. Мемнан коклаште коммунистат, демократат, кучем пелен ыштыше, кучем деч ораланыше еҥат улыт. Кузе нуно ик оян лийын кертыт? Ме ожнысо родо-племенной жапыште але Китайыште она иле - калыкым стройыш шогалтен поктен от наҥгай. 

Лийшаш чыла марийым ушен шогышо ик идей, тыгай идейже уло - ме марий улына да марий йылмынам, тÿвыранам арален кодыман, умбакыже вияҥдыман. Марий-влаклан икте-весым пагалаш, вес семын шонышым чыташ да колышташ тунемман. Марий мер толкыным вуйлатыше-влак марий калыкын тÿрлö улмыжым шотыш налшаш, "чын марий" да "предательлан" шеледышаш огыл. 

Господин Смирновын Мер каҥаш пелен бюром ышташ кÿлмö да кö тушто шинчышаш ой денат ом келше. Мер каҥашын шке пöлемже (пöртшö) лийшаш, тудо паша кечын виш лийшаш, но тушто Оньыжан секретарьже (але секретарьже-влак) шинчен кертыт, нунылан оксам тÿлыман. Садлан, Мер каҥашлан оксам кушеч налме нерген шоныман.

Вара ик йодыш мыйым тургыжландара. Мемнан марий мер илышыш кугыжаныш утыж дене ок шÿшкылт? Кеч-могай демократий кугыжанышыштат кучем мер толкын-влаклан полшен шога, но нунын пашаш шеҥылт ок пуро, мемнан элыште - мöҥгешла. 

Марий Эл кучемын кÿштымыж почеш ышталтын шоя мер толкын "Марий национальный конгресс", тудлан кугыжаныш миллион дене оксам ойыра, чын шкевуя мер толкын-влакым (Марий ушем, Мер Каҥаш) Марий Элыште тÿрлын шыгыремдылыт. Молан "шоя"? Чын мер толкын калыкын инициативыж почеш шочеш да кучемым терген шога, "шоя конгресс" мер илышым сотараш да кучемым мокташ ышталтын.

Вот мый тендан "Мер Ой радиоштыда" Нина Максимован да Владимир Козловын ойлымыштым колыштнем ыле, те нунылан мутым пуэда мо? Ала, кокытеланем. Вес гана, векат, "Марий национальный конгресс" гыч еҥым ÿжыда.

MariUver

Важ: Mari-el.name