Маркеловын командыже марий мер толкыным тÿрлын шыгыремдылеш
24.03.2005
 20
ÿярняште Йошкар-Олаште Регион-влак кокласе "Марий ушем" мер организацийын
отчет-сайлымаш погымашыже эртен.
Пытартыш кок ий жап мер толкынлан поснак неле лийын: тидыже Марий
Эл Республикыже лийын шогышо мер-политик илыш дене кылдалтын. Кузе мемнан
лудшына-влак палат, тиде пагытыште кучем да мер толкын-влак кокласе
кыл моткочак пÿсемын.
Президент Леонид Маркеловын вуйлатыме командыже мер шÿлышым пиктенак
толеш, тудын ваштареш тÿрлö шылтыкым кычалеш, чаракым шындылеш, мер илышышсе
чолгаеҥ-влакым шыгыремдылеш.
20 ÿярнясе конференций кучем могыгрым тыгай шыгыремдылмашын лектышыжым
чотак тÿжваке лукто. Ончыч тыгай конференцийлаште 120 наре еҥ делегат семын
толын гын, таче 67 еҥ гына шке Марий лÿддымö кумылжым ончыктен.
Тыгак рашеме: ятыр районышто отчет-сайлымаш конференций эртаралтын огыл,
тыгак икмыняр район гыч делегат-влак йöршынак лийын огытыл. Тиде - Килемар
да моло районла.
"Марий ушемын" вуйлатышже Ираида Степанован докладыштыже тыге
палемдалте: ушем пашам ыштен, но ситыдымаш моткочак шуко, шыгыремдылмылан
кöра еҥ-влак шке чолгалыкыштым мöҥгештареныт.
Пытартыш жапыште гына "Марий ушем" вуйверын районысо пöлкажым вуйлатыше
кок еҥым паша гыч луктын колтеныт (йодмаш шке кумылын возаш виешленыт).
Тиде - Шернур районын да Кужеҥер районын вуйлатышышт.
Палемдена: регион-влак кокласе "Марий ушем" сайлымаш кампанийыш ушнен
огыл гынат, тудымат тугакак шыгыремдылыт, тÿрлö шылтыкым муыт. Тачысе ик
эн кугу ситыдымаш - оксам муаш неле, а аренде да пöлем кучымо роскотым
кугыжаныш пеш чот кугемден.
"Марий ушемын" конференцийже отчет-сайлымаш статус дене ыш эртаралт
- кворум чумырген ыш шу. Сандене тудлан "Марий ушемын" кумдаҥдыме погынымашыже
статус гына келшен тольо.
Туге гынат погынышо калык ончыклык вуйлатыше шотышто кок шонымашын ыле.
Вет сайлымаш лиеш гын, кок еҥын лÿмжö лектеш ыле. Иктыже - "Марий ушем"
Йошкар-Ола пöлкан вуйлатышыже Нина Максимова да кокымшыжо - "Марий чаҥ"
газетын тÿҥ редакторжо Евгений Чашкин. Но сайлымаш ыш лий.
Конференцийым тÿрыс Устав дене келшышын эртараш манын, тудым ик тылызылан
шенгекырак шÿкалме да 24 вÿдшорышто эртараш кутырен келшыме.
Ончыклык вуйлатыше-влакын тачысе лÿмышт пале. А кöм эше темлаш тÿҥалыт
ик тылзе пагытыште - жап ончыкта. Ятырынже кумшо лÿм лектешак манын шонат.
ЭИА "МариЭкспресс"
|