Вуйнам савена

23.04.2005

Марий калык курымла мучко легенда ден преданийлаште шкенжын патыр эргыже-влак нерген шарнымашым арален. Неле годым нуным шарналтен, шÿгарышт ÿмбаке миен вуйым савен, ушан ой-каҥашым, тушман ваштареш шогаш вийым йодын. Таче ме калыкын ойсаскаштыже аралалт кодшо нунын лÿмыштым сайын палена. Тиде - Чумбылат, Болтуш, Акпатыр, Акпарс, Мамич-Бердей да молат.

Марий калык кугу чотан огыл. Шке кугыжаныш дене илымашкат чумырген шуын огыл. Но шке Юмыжым, йылмыжым, илыш-йÿлажым арален кодаш манын, тудлан ÿмыржє мучко шуко тушман дене кучедалаш логалын.

Поснак XVI курымышто калыкна неле тергымаш гоч эртен. Ик велым Озаҥ ханство темден, вес могырым руш кугыжаныш шыгыремден толын.

Эрык верч кучедалмаште шуко патыр марий ончылъеҥ, он вуйжым пыштен. Мутат уке, чылажым ме огына пале. Калыкыште Болтуш онын чапланымыже нерген преданий сайын аралалт кодын. Вÿдшор тылзын лач коло кудымшо кечыштыже тудо тале кучедалмаште ÿмыр лугыч лийын. Тиде кечын кажне ийын Марий талешке кечым палемдена да патыр он-шамычнам порын шарналтена.

Е.Садовин