Вить диплом - удмуртъёслы

14.11.07

Ортчем арня вискын Сыктывкарын ортчиз Россиысь фин-угор журналистъёслэн куинетӥ фестивальзы. Солэн ужаз пыриськизы Россиысь укмыс улосысь но республикаысь журналистъёс но кивалтӥсьёс. Сиё-дано ужрадэ вуылӥзы кунгож сьöрысь - Эстониысь но Финляндиысь - куноос. Вераськон мынӥз фин-угор газет-журналъёс азьын сылӥсь ужпумъёсъя. 

Фестиваль дыръя ик йылпумъянъёс лэсьтэмын ивор вöлмытон ёзъёс куспын радъям конкурслы. ӵошатсконэ оглом 37 издание пыриськиз. Удмурт шаерысь журналистъёс вить дипломен бертӥзы. «Удмурт дунне» газетмес куинетӥ интыен но синпель кузьымен пусйизы фин-угор калыкъёслэн сям-йылолъёссылы сӥзем ӟеч фоторепортаж лэсьтыны быгатэмез понна. «Кенеш» журналэз дунъязы «Фин-угор юмор» номинациын. Нош егитъёслэн «Инвожо» журналзы кыкетӥ инты басьтӥз «Выль поколенилы чаклам устоез издание» номинациын.

Тужгес но зол удалтӥз «Кизили» журналлы, диплом дуре со кык пол потано луиз. Нырысь ик покчиослэсь журналзэс дунъязы сям-йылолъёсты утьыны тыршемез понна. Со сяна, «Тужгес устоез вылтус» номинациын журналлы куинетӥ инты сётэмын. Пусйыны кулэ: таяз фестивальын пöртэм номинациосын нырысетӥ интыос сётэмын вал Коми Республикаысь но Карелиысь газет-журналъёслы. 

Фестиваль возьматӥз: фин-угор журналистъёсты трос пöртэм сюлмаськонъёс шугъяськыто. Ӵапак со ужпумъёсты ӝутонлы ик сӥземын вал фестиваль дыръя радъям кенешонъёс. Но таиз сярысь пыр-почгес мадём ини вуоно номерамы. 

Источник:  Удмурт дунне